مواضيع مهمة

مرحبا بكن في ربة بيت ممتازة
بتاريخ : 17‏/02‏/2017

وصفة طبيعية مجربة للحصول على شعر كثيف وطويل والتخلص من تساقطه



وصفة طبيعية مجربة للحصول على شعر كثيف وطويل والتخلص من تساقطه

البنات خاصنا نعرفوا ان الشعر ديالنا كيكبر بمعدل سمنتيم واحد
في الشهر تقريبا والفترة ديال نمو كل زغبة تتاخذ على الاقل
عامين الى 6 سنين ومن بعد تتجمد في بلاصتها حتى تسقط وقبل 
ما تسقط تتكون وحدة ناضت بعدا في بلاصتها وهكذا تيبقى
حال الشعر عندنا الى ما اراد الله سبحانه وتعالى .

كلنا تنبغيوا الشعر طويل ورطب وصحيحي بلا قشرة بلا مشاكل
وكوني حبيبتي على يقين ان ما كايناش شي مساحيق تطول لك الشعر 
ويكذب عليك الكذاب يقول لك عندي خلطة خاصة فقط بتطويل الشعر
الا خاصك تعرفي حاجة مهمة وهي العناية بالشعر من الداخل ومن 
الخارج يعني الاكل الصحي مهم بزااااف ومفيد باش تعملي توازن
بين الصحة الداخلية يعني الجهاز الداخلي والجهاز الخارجي الي
فيه طبقة الجلد والشعر ولهذا فما تبقايش تصدعي راسك بفكرة
وصفة لتطويل الشعر لكن كاين وصفات تساعد على صحة 
وجمال الشعر بحال تقوية الزغبة وزيادة كثافة الشعر ، وخا تنشوفوا
عيالات عندهم الشعر طويل واخريات عندهم الشعر قصير وعاكز 
هذا تيرجع للجينات الخاصة بكل وحدة فينا .

واسباب تساقط الشعر كثيرة

والي خاصنا نعرفوا انه كاين ما بين 20 حتى 100 زغبة تتسقط
في اليوم ودائما سبحان الله ما تتسقط زغبة حتى تتكون وحدة في
بلاصتها وهذا امر جد عادي ولكن كاينا عوامل تتكون مسببة في
تساقط الشعرة بكثرة الجهد الي ما تتخليش الوقت فين تنوض
الاخرى باش طيح وحدة ومن هاذ الاسباب كاينا زيادة هرمون 
الذكورة في جسم المراة وهذا سبب كافي باش الشعر يقل ويتساقط
وبخلاف سبحان الله تيكثر في الوجه وفي الرجلين وفي بلايص غير
مرغوب فيه بحال الذقن يعني اللحية لاننا 
تنشوفوا عيالات عندهم شبه لحية 

كذلك نقص الاستروجين تيخلي الشعر يتساقط بحال في نهاية
الحمل او ملي نتوقفوا على تناول حبوب منع الحمل بع شهرين
او 3 ولكن هاذ التساقط سرعان ما يتعالج ويرجع كما كان 
ويخلف ولكن نقص الاستروجين في فترة سن الياس الشعر 
الى كان قليل وما تعطاتوش اهمية تيبقى قليل ويبقى في التساقط
وما كاين حتى شي حاجة الي ترجع لو طبيعته وهذا علاش خاص
الاهتمام بالشعر يكون في فترة الشباب باش دائما يبقى صحيح
وخا في فترة سن الياس وكذلك سبب الانفعالات والمشاكل النفسية
والعصبية تتلعب دور كبير في تساقط الشعر فقر الدم وتناول ادوية
الاكتئاب المضادات الحيوية ادوية الغدة الدرقية لكن سرعان
ما يتعالج السبب تيرجع الشعر لطبيعته من جديد .

وعاد نزيدوا على اسباب حنا الي تنسعاوا ليها بحال الترطيبة 
الكيماوية والصباغة و الاهمال الشعر خاصو يتمشط 2 حتى 3 مرات
في اليوم وحنا اكيد كاينا فينا الي ما تتمشطوش نهائيا في اليوم يعني
تتبقى مكمداه وتقولك شعري ما تيطوالش وقليل وسخفاااااان ههههههههه

اقنعة جمال الشعر وترطيبه


كثيرة بزاف ولكن ما خاصناش نبقاوا الي سمعناها نديروا
شعرنا حقل للتجارب هاذي تنفع وهاذي تضر غلط تبعي وصفة
تكون في برنامجك الروتيني للشعر لان الاهتمام يخلي الزغبة
تكون صحيحة وهذا تيعطي ارضية باش الزغبة تلقى فين تكبر 
وتطوال بسرعة يعني ماشي وصفة لتطويل الشعر والله ما كاينا
شي وصفة في العالم الي تخلي الشعر يطوال بخلاف الترطيب
والنعومة وتغيير اللون وتزولي منو الدرارج
وبهاذ المناسبة غادي نعطيك وصفة لترطيب الشعر الي متقصف
ومكرد ومشعكك وباهت ولكن المتابعة والمداومة حتى تحصلي
على شعر رائع وصحيح وناعم وملي تيقولوا لتطويل الشعر راه
ملي تيرطاب الشعر تيتجبد ويبان انه طويل على الي كان عليه
من قبل هذا هو الي كاين .

المواد ساهلة بحال ديما وموجودة لا اشكال فيها :


اولا
السيروم الي سبق وحطيت لكم ضروري مقوي
ومعالج للتساقط راه في الملف هذا بلاما نهضروا عليه معروف 

ثانيا
الغاسول بالاعشاب تيغذي فروة الراس ويخلي لك الجلدة بحال
المحبق الي فيه الغريسات باش يتقواو

ثالثا 
هاذا ماسك خطير لترطيب الشعر مرة في الاسبوع لمدة
تزيد على 3 اشهر باش تحصلي على نتائج مميزة وواضحة 

الجنجلان محمر ومطحون وزريعة الكتان مطحونة 
وحب الرشاد مطحون ولزاز مطحون طريف من الصبار


راه غير طريف من الضركة كافي حتى هو نوع
من الصبار مطحون وبيضة كاملة 
وزيت الزيتون وزيت الكوك 

القياس عينك ميزانك حتى تحصلي على خلطة متوازنة

تخلطيهم مزيان غادي تحصلي على معجون بحال شكل 
الحنة وتمشطي شعرك وديري ليه شوية المساج لفروة
الشعر وديري لو القناع وتغطي شعرك ببلاستيك غذائي 
وديري زيف الفوق بحال حياتي وخليها لمدة ساعتين او
اكثر وتغسلي كالعادة وفي الاخير كبي على راسك محلول
البابونج الي تيعطي اللمعان ويصفي اللون ديال الشعر 

وعمرك دهني شعرك وهو فازك وكذلك ما تخليهش
عريان خاصوا يبقى ملفوف في الفوطة حتى تشرب 
الماء الي فيه وهو يتغذى من الرطوبة وهكذا ملي ينشف
شوية يعني ما يبقاش يتساقط تماما دهنيه ودوري لو الباتشا 
بالنهار وعاوديها وفي الليل تمتعي به مطلوق او حسب الرغبة
ديالك والى تبعتيها لمدة 3 اشهر تشوفي الحرير والرطوبية الي
ما يديرهاش الكيراتين الي تيرطب الشعر وفي ظرف 2 اسابيع
يبدا يبان لك لاستيك جاي النص مسرح والنص تيشطح مرولي
هههههههههههههه ايوا هاني زولت الي عليا 
والباقي عليكم وبالصحة والراحة .



التعليقات

صوت وصورة

copyright © 2016 جميع الحقوق محفوظة لـ مرحبا بكن في ربة بيت ممتازة