مواضيع مهمة

مرحبا بكن في ربة بيت ممتازة
بتاريخ : 28‏/02‏/2017

ملفي الكامل للعناية بصدري للتخلص من الترهلات وشده



ملفي الكامل للعناية بصدري للتخلص من الترهلات وشده

السلام عليكم البنات، انا قبل منتزوج كان صدري مسطح تماما بحال شي دري كنت ديما كنلبس السوتيان ديال البونج و بسبب هاد لمشكل رفضت شحال من مرة الزواج رغم انني الحمدلله زوينة و طويلة و الفورمة ديالي من التحت زوينة و لكن الصدر والو ماكينش لموهيم ملي ولا عندي 26 عام جاني ولد الناس و مقدرتش نرفض خفت نرفض و نبقى عانس ههههه. اوا قلت نبالي بصدري درت تدليك بزيت الحلبة و تمارين بنت العذاري مدة شهر و النتيجة صدري تنفخ شوية يعني فرق خفيف مكيبانش بزاف و مرضت بالبرد حينت بعد التمارين كنت كندوز على صدري الثلج و بيتي خنزات بريحة الحلبة بدون فائدة و قريت على الكديرة و مقدرتش نمشي نديرها عند شي مراة و انا نخترع واحد الطريقة هههه.كنت كنديرها بقرعة ديال الكوفتير الكبيرة خاوية و شمعة لموهيم هاد الطريقة خرجات ليا صدري شوية مبقاش لاصق و لكن مزال صدري صغير بزاف و جا نهار عرسي و نكافة بقات كضحك عليا قالت ليا و يلي على الشوهة اش هاد الصدر لي عندك و انا مرضيتش و الله العظيم اخوتاتي الى دارت ليا جوج ديال السوتيانات ديال البونج و عمراتهم بكلينيكس باش بان صدري فاللبسات شفتو على شوهةهههه. و فليلة الدخلة راجلي تصدم و لكن مقاليا والو مسكين بلعكس بدا كصبرني قال ليا دابا مع الزواج الحمل غادي يكبر صدرك ههههه. دوزت عامين ديال الزواج و زدت فالوزن ديالي و صدري بقا هوا هوا و حملت وولدت و كبر صدري غير شوية لدرجة ان ولدي مسكين مقدرش ارضع حينت البزولة كانت صغيرة و راسها صغير حتى شريت هداك الراس ديال البزولة لي كيتباع فالفرماسي عاد ولا كيرضع و ملي فطمت ليه كارثة صافي تفش صدري ولا صغير و ولا جليدات و المشكلة ولات عندي بزولة كبر من الاخرى (حينت ولدي كان كيرضع البزولة اليمنية بزاف) قال ليا راجلي ولا عندك صدر معوق و بقا فيا الحال و قررت نلقى شي حل لهاد الصدر لي محشمني قلبت فالانترنت مزيان و درت برنامج فيه تدليك و اكل و مشروب لتكبير الصدر بديتو هادي اسبوعين بانتظام و البارح راجلي لقاني كالسة فالبيت و لابسة تيشورت و قال ليا مالكي لابسة السوتيان حتى فالدار و انا ماكنتش لابساه قلت ليه انا ملبساش السوتيان قاليا ايوا العجب باين صدرك منفوخ من تحت الحوايج و انا فرحت و عريت على صدري قلت ليه شوف مزيان و اش صدري كبر قال ليا اه صدرك ولا منفوخ و مدور و فرح حتا هو لدرجة انو ولا كيساعدني فالتدليك باش ازيد يكبر كثر هههههه و هدا هو البرنامج ديالي غادي نعطيه ليكم هدية غي امانة عليكم دعيو معاي ربي يفك ضيقتي. 
اولا غادي تصوبو الكريم ديال التدليك ريحتو زوينة مفيهش الحلبة و كيساعد فتكبير الصدر غادي تحتاجو لهاد المقادير:

- حليب جونسون الوردي 
-كاس زيت الزيتون
- معلقة كبيرة ديال الخزامة
-معلقة كبيرة ديال الصوجا
- معلقة كبيرة ديال النافع
-معلقة كبيرة ديال الزنجلان
-شوية ديال البابونج
-شوية ديال السالمية كارمة
-2معالق كبار ديال عرق السوس

الطريقة:
كتاخدي كاع دو ك العشوب جمعيهم فالطحانة و طحنيهم مجموعين ( عرق السوس خاص تهرسيه فالمهراز عاد طحنيه) و ديريهم فكسرونة ووزيدي عليهم كاس و نص ديال الما وخليهم يغلوا ونتي مغطيا عليهم على نار مهيلة حتى يبقى غير نص كاس ديال الما و زيدي كاس ديال الزيت الزيتون و تخليهم يغليو فوق النار حت تبقى غير الزيت يعني ملي تصفيهم خساك تلاقاي كاس الزيت خلي الزيت حتى تبرد و جيبي كريم جونسون و خويه فاناء ديال الزاج و بقاي تكبي عليه شوية بشوية ديال ديك الزيت حتى ينساجم الخليط و يولي كريمي انا كان عندي 2 قرعات ديال جونسون خاوية عمرتهم بالكريم باش يسهال عليا استعمال ديالو.
ندوزو المشروب هاد المشروب غني بالاستروجين و كيساعد على الهظم و مفيد للمعدة و المصران و كيصفي البشرة و كيزيد فالوزن المقادير :

-2 دراهم النافع
-2 دراهم الكروية 
-2دراهم الكروية العمية
-2دراهم حبة حلاوة
-4 دراهم عرق السوس(لي عندها طونسيو كيطلع ماديروش)
-ـ2 دراهم مرددوش

كتنقي هاد الزرارع كاملين و طحنيهم( عرق السوس دقيه فالمهراز عاد طحنيه) و خلطيهم فشي قرعة ديال الزاج و كل ليلة كتاخدي معلقة متوسطة من هاد العشوب و كدريها فقرعة ديال الزاج ديال الكوفتير الكبيرة تكون خاوية و نقية و كبي عليها الما طايب حتى تعمر و دغيا سديها و خليها تطلق ليلة كاملة و فالغد غادي تشرب كاس صغير مورا كل وجبة يعني مورا الفطور و الغدا و العصرونية و العشا و تعاودي كلا ليلة تصاوبيه.
ندوزو للاكل كل ليلة غادي تاخدي حفنة ديال الزبيب الكحل البلدي غادي تغسليه مزيان و تزيدي عليه 7 تمرات و معلقة كبيرة ديال الحلبة بلدية حبوب و ديري كلشي فزلافة و كبي عليهم الما الطايب و غطي الزلافة ملي تفيقي فالصباح طحني كلشي و شربيه على الريق و بقاي ساعة عاد فطري هاد العصير مذاقو بنين بزاف مكتبانش فيه الحلبة و حتى الريحة و الله مكاتكونش فيك و هوا صحي بزاف كيداوي فقر الدم و كيخلي الحنيكات موردين و كيوسع الانسجة ديال الصدر و كيزيد فالوزن بطريقة صحية و كيولي فيك الجهد و مكتبقاش السخفة.

دابا نهدرو على التدليك راه ماشي اي تدليك كيكبر فالصدر انا فخلال البحت ديالي فالنت لقيت طريقة ديال واحد اليابانية كان صدرها صغير و خلاها صاحبها و مشا مع وحدة صدرها اكبر ههههه اوا و هيا تبالي براسها و دارت واحد الطريقة ديال ديال التدليك و صدرها ولا 3 ديال المرات اكبر قلبو فاليوتوب على chiyomilk Massage و غادي تلقاو الطريقة هاد الطريقة كتعتامد على تحويل الدهون من اليد و الظهر الى الصدر. 

البرنامج لي غادي تبعوه كالتالي:

غادي تفيقي معى الصباح و تشربي عصير ديال الزبيب و الحلبة و التمر لي وجدتيه ليلة قبل و غادي دهني صدرك بالكريم لي وجدنا قبل و ديري التدليك بالطريقة لي قلت ليك التدليك خاص يكون بطيئ ماشي بالزربة و بالعنف خودي وقتك فالتدليك يعني ما بين 10 ديال الدقايق حتى لربع ساعة، فطري عادي و شربي كاس من المشروب ديال النافع و عرق السوس والاعشاب الأخرى لي دكرنا قبل و تكوني صوبتي هاد المشروب ليلة قبل باش يطلق مزيان.
الغدا :تغداي عادي و شربي كاس ديال المشروب ديال الاعشاب
العصرونية: ملي تاخدي الكوتي ديالك خودي كميشة ديال الصوجا محمرة كوليها و شربي عاود كاس ديال هداك المشروب و دلكي شوية صدرك غير فو ق من الحويج غير شوية لموهيم و قتما تفكرتي دلكي صدرك غير بشوية و ضربيه ضربات خفيفة.
فالعشا تعشاي عادي و شربي كاس من المشروب. و ديري الكريم فصدرك و دلكيه بحال فالصباح مابين 10 ديال الدقايق حتى لربع ساعة و قبل ما تنعسي ما تنسايش تصوبي المشروب ديالك و ترقدي الزبيب و الحلبة و التمر. و بالنسبة للماء خاصك تشربي 2 لتر من الما تخلطي معاه 2 معالق ديال ما ورد ماشي ديال مكونة لا نتي صوبيه خودي شوية ديال الورد البلدي يكون جديد غسليه و ديريه فقرعة ديال الزاج و كبي عليه الما طايب و غطيه و خليه ليلة كاملة حتى يطلق صفيه و ديريه فالثلاجة و كل نهار خودي منو 2 معالق كبار و ديريهم ف2 لتر ديال الما لي خصاك تشربيه كلو فداك النهار.

النتيجة ديال هاد البرنامج من بعد أسبوعين كبر صدري و تنفخ و لا عامر شوية و مدور و البشرة ديالي صفات و لو عندي حنيكات موردين و داويت المعدة و المصران و فقر الدم شفتو شحال من فوائد فيه. اوا جربوه و دعيو معايا. 
البنات سمحو ليا الى مجاوبتش على الاسئلة ديالكم حينت انا ماعنديش الكمبيوتر راني كانكتب ليكم غير من التيلفون ومعدبا معاه كولشي يهون على ودكم حينت بغيتكم تستفدو كيفما ستافدت. اوا هادا جهدي عليكم راه كلشي موضح و باين خاص غير تحيدو العكز و المداومة و الانضباط. و عافكوم متنساوش دعيو معيا




التعليقات

صوت وصورة

copyright © 2016 جميع الحقوق محفوظة لـ مرحبا بكن في ربة بيت ممتازة